Instagram: @dana_yesseyeva
Танымал блогер, кәсіпкер Дана Есеева сәлем салуға қатысты ойын айтты.
Блогер енесімен бірге Ләйлә Сұлтанқызына сұхбат беріп, келіндік өмірдің қызықтарымен бөлісті.
«Қонақ келген сайын сәлем салып жүресің. Келін болғалы неше жыл өтті, әлі күнге дейін орамал тағасың ба?» дегендер көп болды. Мен одан проблема көріп тұрған жоқпын. Ол проблема емес. Айына бір-екі рет келетін қонақтар үшін орамал тағып, келін көйлегіңді киіп, сәлем салудың еш қиындығы жоқ қой. Батасын аласың қайта. Менің ойымша, салт-дәстүрлер отбасының бір жалғасы сияқты. Енді оны бұзып тастасаң, ол отбасының бір әдемілігі кететін секілді көрінеді. Басында-ақ маған орамал тағу керек деген кезде, бірден келістім. Мен керісінше, шашым аппақ болғаннан кейін орамалды тастамай тақтым. Орамалдың ішіне көрінбейтіндей тығып тастайтынмын»,
деді блогер.
Одан кейін алғаш босаға аттап, келін атанған сәтін де есіне алды.
«Келін болып түскенде кинода жүргендей сезіндім. Өзбекстанның Зарафшан деген қаласына бардық. Машинадан түскенде көп әжелер күтіп алды. Мейіржан мені әкелді де, өзі бір жаққа кетіп қалды. Сәлем сал деп жатты, оны қалай істеу керек екенін білмедім. Абысындарымнан қайталап істеп жүрдім. Шымылдықтың астына отырғызды мені»,
деді Дана.
Дананың енесі отбасында жасалатын ырымдар жайлы айтты.
«Бізде ене мен келіннің қарым қатынасы берік болсын деген ниетпен екеуінің арасына ыстық таба нан қойып, құшақтастырады. Содан кейін бар болса да, жоқ болса да киіз үй тігеді. Соған шымылдықты қадайды. Есікке кірместен келінге май иіскетеді»,
деді Мейіржанның анасы.
Фото: Instagram
Дереккөз: «Qstar group» YouTube арнасы
The post Дана Есеева сәлем салуға қатысты пікір білдірді appeared first on ELLE Kazakhstan – мода, красота, тренды, звезды, отношения.
